INYIGISHO YO KU CYUMWERU CYA 21 GISANZWE, UMWAKA A

Uhoraho, ndakuririmbira imbere y’ab’ijuru bose

Bavandimwe Kristu Yezu akuzwe,

Inyigisho yo kuri iki cyumweru cya 21 mu gihe Gisanzwe A, nyitangije imwe mu nteruro z’amagambo y’umwanditsi wa Zaburi 137 twagenewe kuzirikana kuri iki cyumweru agira ati: “ Uhoraho, ndakuririmbira imbere y’ab’ijuru bose.” Mu rurimi rw’igifaransa hari aho bayavuga bagira bati: “Je te chante devant les Elohîm”. Ni nk’aho bagize bati: “ Uhoraho ndakuririmbira imbere y’ibigirwamana by’isi n’imbere y’ibinyabubasha by’ijuru.” Ni amagambo yuzuye ukwemera muri Uhoraho duhabwaho impamba kuri iki cyumweru ngo tuyagire isengesho ryacu n’intego y’ubuzima. Ni kenshi dutinya gukuza no gusingiza Imana kubera ibikangisho by’isi, ni kenshi dutinya guhamya Imana mu ruhame, imbere y’ibikomangoma n’ibihangange by’isi tugahitamo guceceka aho guhamya uwo twemeye. Ibyo ni ukwirengagiza ubutore dufite muri Kristu Yezu twemeye kubera abahamya muri Batisimu twahawe no mu gukomezwa.

UBUTUMWA BW’IMANA BURAHARI KANDI BUGOMBA GUKORWA

Amasomo yo kuri iki cyumweru aradufasha kugaruka kuri ubwo butumwa butandukanye Nyagasani Imana aduha rwagati mu muryango we. Ni ngombwa, birakwiye kandi biratunganye ko tutibagirwa ubutumwa ndakuka dufite nk’ababatijwe bwo guhamya Kristu dushize amanga igihe cyose n’aho turi hose. Turabicengera mu ngero zitandukanye duhabwa n’amasomo y’iki cyumweru, kuko ubutumwa bw’Imana burahari kandi bugomba gukorwa uko byagenda kose kugeza igihe Kristu azagarukira, iyo uyu cyangwa uriya atabushoboye Imana igena undi kuko ntacyahagarika umugambi wayo.

Mu isomo rya mbere ryavuye mu gitabo cy’umuhanuzi Izayi, yatubwiye uburyo Uhoraho yiyoborera umuryango we abigirishije abo atora, akabaha ubutumwa ngo bamuhagararire. Twumvise Uhoraho yitorera Eliyakimu ngo amuhe ubutumwa agasimbura umutware wari utacyubahiriza amabwiriza y’Uhoraho. Eliyakimu yatowe n’Imana kugira ngo abe umunyabintu i Bwami kandi abe n’umutware w’Ingoro. Uyu mwanya yawusimbuyeho Shebuna (Iz22, 15) wavuyeho nabi kubera ubwirasi, irari ry’ibintu, kuyobya umwami mu nama yamugiraga no gucunga Ingoro y’Imana nk’akarima ke! Shebuna uyu tubwirwa, yari umutware i Yeruzalemu ku ngoma y’umwami Ezekiyasi ahagana mu mwaka wa 700 mbere ya Yezu. Uwo mwanya yarimo I bwami wari umwanya ukomeye kuko mu nshingano ze harimo no gutunga imfunguzo z’i bwami (Pouvoir des clés). Mu iyimikwa rye yavugirwaho amagambo dusanga mu gitabo cya Izayi (22,2): “Nzashyira ku ntugu ze urufunguzo rw’inzu ya Dawudi, nakingura, he kugira ushobora gukinga, nakinga, he kugira ukingura”. Ibyo byari ikimenyesto cy’ububasha n’ikizere afitiwe i bwami. Gusa ntiyabashije kubyitwaramo uko bikwiye, ni uko umwanya we uhabwa undi. Imana yitoreye undi Eliyakimu, imuha ububasha bwo gukingura maze bose bakinjira mu Ngoro y’Imana.

Ubuzima bwa Eliyakimu nta cyo Bibiliya ibuvugaho cyane ariko n’iryo zina ubwaryo risobanura ngo « Uwahamagawe n’Imana ». Na we rero ari mu mubare w’abo Imana yatoye kugira ngo ayobore umuryango wayo. Twabyumvise aho Uhoraho agira ati: “azabera umubyeyi abatuye Yeruzalemu n’abo mu nzu ya Yuda”. Aha tuhumve neza, ntabwo ari twe twiha ubutumwa. Ni Imana itora kandi igatuma, ikatwifashisha kugira ngo tugire uruhare mu gikorwa cyayo cyo kugeza umukiro ku isi.

GUHAMAGARWA N’IMANA NI UKUYEMERA NO KUYIBERA UMUHAMYA

Bavandimwe, Mutagatifu Pawulo yahamagawe n’Imana. Tuzi ko mbere yari umufarizayi, tuzi kandi ko yatotezaga Kiliziya. Ariko umunsi umwe ahura na Nyagasani mu nzira ijya i Damasi, uko guhura na Nyagasani kumubera intangiriro yo guhinduka no kwinjira muri gahunda y’Imana wese. Uwatotezaga ahinduka umuhamya ukomeye w’ukwemera yarwanyaga ndetse ageza uko kwemera no ku banyamahanga. Mu isomo rya kabiri turamwumvise atangaza yishimye ibitangaza by’Imana: Byose bikomoka kuri Nyagasani, bikabeshwaho na We, kandi bikaberaho We. Pawulo Mutagatifu arashimira Imana yo irangwa n’urukundo igihe cyose. Abantu bose, baba abayahudi cyangwa abanyamahanga, bahamagarirwa kuba abana b’Imana. Imana ishaka guha abantu bose ihirwe ryo kuba abana bayo. Iyo nkuru nziza ni yo yagombye kutunezereza. Ibi ni ingenzi kuri twe, kuko akenshi dushaka kwireba gusa aho kureba ugushaka kw’Imana. Nyamara kuva ku munsi wa Pentekosti, intumwa za Kristu zahamagariwe gusohoka, zoherejwe mu isi yose, isi idakunda cyangwa ititaye ku rukundo rw’Imana. Nka Pawulo intumwa, tube abogezabutumwa hose. Ubutumwa bwa Kiliziya ntabwo ari ugushaka umukiro wayo yonyine, ahubwo ni ugushaka umukiro wa bose.

PETERO, URUTARE N’IKIMENYETSO CY’UBUMWE BWA KILIZIYA

Mu ivanjili y’iki cyumweru, Petero aratubwira Yezu uwo ari we. Ni Kristu Umwana w’Imana nzima. Hari uburyo nka bubiri bw’ingenzi bwo kumenya Yezu. Hari ukumubwirwa, hari no guhura na we.

Kumubwirwa: Nicyo kibazo cya mbere Yezu abaza intumwa ze. « Abantu bavuga ko umwana w’umuntu ari nde ? Mu yandi magambo, abantu muhura nabo, abo muturanye, abo mukorana bavuga ko ndi nde ? » Ibisubizo birahita biza. « Bamwe iyo bumvise inyigisho zawe bahita bavuga ko uri Yohani Batista. Abandi iyo babonye ibitangaza ukora bavuga ko uri Eliya. Hari n’abavuga ko uri Yeremiya. Icyo bose bahurizaho ni uko uri umuhanuzi ». Ubwo ni uburyo bwa mbere bwo kumenya Yezu uhereye ku byo abandi bamuvugaho, kubyo bakwigishije muri Gatigisimu, cyangwa se ku byo wasomye mu bitabo. Ubu buryo ni bwiza ariko ntibwuzuye. Koko nk’uko abakurambere babivuga, « Ijisho ry’undi ntirikurebera umugeni ». Hari uburyo bwa kabiri bwo kumenya Yezu by’ukuri. Ni uguhura nawe, ukamwakira ukemera kubana nawe, ukakira umukiro atuzaniye.

Guhura na Yezu no kubana nawe: Ikibazo cya kabiri Yezu abaza abigishwa be niho kiganisha. « Ibyo rubanda bavuga nabyumvise. Mwebwe se mwankurikiye mukemera kuba abigishwa banjye muvuga ko ndi nde ? » Petero arasubiza mu mwanya wa bagenzi be ati « Uri Kristu, Umwana w’Imana nzima ». Yezu aramushima ati « Urahirwa kuko Data yaguhishuriye uwo ndi we ». Kumenya Yezu ni impano. Ni kado Imana iduha ku buntu bwayo. Koko rero ntacyo twatanze ngo dukunde tumenye Imana n’uwo yadutumyeho Yezu Kristu. Kuba turi abakristu dukwiye kubyishimira kandi tugahora dushimira Imana ubuntu bugeretse ku bundi yatugiriye. Ngo « Uwambaye ikirezi ntamenya ko cyera ». Bakongeraho ngo « Kandi iyo atabimenye aracyanduza ». Hari ubwo njya ndeba ibibazo isi yagiye ihura nabyo na n’ubu bitararangira nkibaza uko isi iza kuba imeze iyo iza kuba idafite abakristu. Nkeka ko kumenya Yezu n’umubyeyi we Bikira Mariya ari isoko y’imbaraga n’ubutwari mu bihe bikomeye kandi kumenya Yezu by’ukuri bijyana n’ubutumwa.

BURI MUKRISTU AFITE UBUTUMWA BWE MURI KILIZIYA

Bavandimwe, igisubizo Petero yatanze cyamuhesheje izina rishya rijyana n’ubutumwa bushya. Yezu ati “Noneho nkubwiye ko uri Urutare (Kefasi= Petero). Petero ni We Rutare rumwe Yezu yashinze ho Kiliziya ye. Igisubizo cya Petero cyatumye Yezu aduhishurira ko Kiliziya ye ari Imwe. Ati “nzubakaho Kiliziya yanjye (Mt16, 18). Abandi bigishwa bose nk’uko bari bateraniye hamwe muri Kayizariya ya Filipo, ntibigeze baburana cyangwa bagira ishyari cyangwa bicamo íbice! Bose bahamagariwe kwamamaza Kristu muri iyo Kiliziya imwe ikuriwe na Petero. Byongeye nta bandi bahawe imfunguzo. Ibi bivuga ko ibyo dukora byose muri Kiliziya bigira agaciro kandi bikatwinjiza aheza iyo twunze ubumwe na Petero (Papa) mu kwemera kumwe we yamamaje. Amadini n’amatorero y’urudaca bituruka he ? muri iki gihe bireze, wumva none ngo kanaka yashinze agacaci nk’uko babivuga, ejo akiyita apotere, bishopu, n’ibindi, ibyo biva he koko?

Ntabwo buri wese mu Ntumwa yigeze asaba ko nibura yaba akabuye gato kakubakwaho ka Kiliziya gato wenda kihariye, kigenga ukwako! Bose bemeye guhurira muri imwe Yezu atangaje azubakira kuri Petero! Dusabe Yezu aduhe ubumwe. Kiliziya ni imwe. Urutare yubatsweho ni rumwe, Petero (Papa) ni umwe, Yezu umwana w’Imana ni umwe.

Kiliziya yubatswe kuri Petero intumwa ifite ububasha: Irakingura abapfuye bakazuka (batisimu), bagera mo imbere bagahazwa (Ukaristiya), bahazwa neza ifunguro ryabayoboka bagakura, bagakomera bakitangira guhereza abandi (ugukomezwa), n’iyo barwariye mo imbere nk’uko umwe mu muryango yarwara, baravuzwa bagakira (ugusigwa kw’abarwayi na Penetensiya). Abana ba Kiliziya, bayirimo rwose, bararumbuka. Kiliziya ni umuryango ukura, ukaguka (Ugushyingirwa n’ubusaserdoti). Uko umusaserdoti yigisha, agatanga amasakramentu, akayobora imbaga y’Imana, burya umuryango w’Imana uba urumbuka, waguka. Iyo abashakanye babyara, bakabatirisha, baba bakuza umuryango w’Imana.

Bavandimwe, iki cyumweru kidufashe kwitarura ibintu byose biturangaza bikatubuza kubaho mu gushaka kw’Imana, bityo twihatire kumva icyo Yezu atubwira; kandi kitubere umwanya wo kureba niba ubutumwa Yezu aduha (mu rugo, mu kazi, muri Kiliziya) tubwakira mu kwemera kandi tukabusohoza mu rukundo n’ubwitange dukurikiza ingero nziza duhabwa mu Byanditswe Bitagatifu. Koko rero buri mukristu afite ubutumwa agomba gusohoza kuri iyi si kandi ni indasimburwa. Mbifurije kumenya Yezu by’ukuri, kumukunda no kumukundisha abandi.

Nyagasani Yezu nabane namwe!