INYIGISHO YO KU CYUMWERU CYA 23 GISANZWE, UMWAKA A

Bavandimwe Kristu Yezu akuzwe, Tugeze ku cyumweru cya 23 gisanzwe, Umwaka liturjiya A. Amasomo matagatifu yo kuri iki cyumweru aradufasha kuzirikana ku ngingo yo gukosorana bya kivandimwe. Buri wese ashinzwe buri wese, nta ntibindeba kandi ntabyo kwibwira ko usenya urwe umutiza umuhoro, abandi ngo uwiyishe ntaririrwa. Gusa kwakira abadukosora biratugora kandi biri muri kamere muntu tugomba gutsinda dufashijwe na Roho w’Imana. Abenshi bibwira ko ari beza abandi ari babi; ku buryo niyo agize agatima ko kukugira inama ashobora gutuma uhindana kurusha uko wari umeze; gusa iyo harimo urukundo rw’Imana rumwe rutaronda cyangwa ngo rubogame byose birakunda kandi bigatungana.

UMUHANUZI NI UMURINZI W’UMRYANGO W’IMANA

Mu isomo rya mbere turazirikana uburyo umuhanuzi Ezekiyeli yashyiriweho gucungira no kureberera Umuryango w’Imana. Agomba kureba neza, akamenya ibyonnyi byugarije uwo muryango, ari ibiri imbere muri wo, ari n’ibituruka hanze. Agomba guhora awuburira, akawufasha kwirinda no gukumira ikibi. Ibi arabyitangira wese agira ngo hatagira upfa azize kutamenya, kutagirwa inama no kutaburirwa. Nk’umushumba mwiza agomba guhora ari maso nk’inkoko ifite imishwi, yiteguye kubundikira igihe agaca kaje, ndetse no gukebura iyisagaza inyuma ngo idatwarwa nta gitabara!

Uhoraho ubwe ni we wamwihereye ubu butumwa: “Nawe rero, mwana w’umuntu, nagushyiriyeho kuburira umuryango wa Israheli” ( Ez 33, 7). Umuhanuzi agomba kwirinda gukabya, gupfobya cyangwa kwirengagiza nkana ubutumwa Imana ubwayo yitangiye. Agomba kubutanga uko bwakabaye: Igihe cyose uzaba wumvise ijambo rivuye mu kanwa kanjye, ujye ubaburira mu kigwi cyanjye (Ez 33, 7).  Ikindi kandi umuhanuzi nyawe ntiyikura mu mubare w’abakeneye gucungurwa. Umuhanuzi ntiyigisha ibigwi bye! Ntiyigisha ibyo yashoboye cyangwa yigomwe cyangwa yihannye cyangwa yaretse! Ibi n’aho atabisakuza, iyo yahuye na Kristu koko, birigaragaza kandi akaba ari bwo bifasha benshi.

Tugarutse ku muhanuzi Ezekiyeli , Uhoraho yamuhaye ubutumwa bwo kuburira umuryango wa Israheli mu cyimbo cye. Yaramubwiye ati : “ Ndamutse mbwiye umugome nti wa mugome we, ugiye gupfa, n’aho wowe ntumuburire ngo ahindure imyifatire ye, uwo mugome azapfa azize ikosa rye, kandi ni wowe nzaryoza amaraso ye . Ariko nuramuka umuburiye ntazibukire imyifatire ye mibi ngo ahinduke, uwo mugome azapfa azize icyaha cye, n’aho wowe uzaba ukijije ubugingo bwawe”.

Ese twebwe mu rugo iwacu, mu bo tubana, mu bo duturanye, mu bo dukorana ku kazi, aho nta muntu twaba twaratereranye, ntitumugire inama akarinda adupfana tureba? Ese nta rugo duturanye rwaba rwarasenyutse tureba, twanze kugira icyo tuvuga ngo tutirenya? Ese twebwe aho tujya twemera gukosorwa? Ese udukosoye tumureba neza? Cyangwa natwe dushakisha aho na we twamutegera mu byamunaniye?

KUTAREBERA UMUVANDIMWE URI MU KIBI

Bavandimwe, kenshi usanga gukosorana kwacu kutagira icyo kugeraho bitewe n’ukuntu tuba twabikoze. Kenshi mu gukosorana kwacu hazamo n’ubwirasi, cyangwa tugashaka gukoza isoni uwaguye mu cyaha. None ikibazo umuntu yakwibaza, ni ukumenya ukuntu gukosorana byagombye gukorwa. Igisubizo Yezu yagitanze mu ivanjili ubwo yagiraga ati “ umuvandimwe wawe naramuka acumuye, umusange maze umuhane mwiherereye”. Yezu ntashaka ko hagira ushyira umuvandimwe we ku Karubanda, kubera ko twese turi abanyantege nke. Nk’uko Imana itugirira ibanga itegereje ko duhinduka, ni na ko natwe twagombye kurigirira abavandimwe bacu. Gukosora umuvandimwe ntibyagombye kuba impamvu yo kwikuza. Gukosora umuvandimwe twagomye kubigirana urukundo nk’uko Pawulo mutagatifu yabitubwiye ati “ntihakagire uwo mubamo umwenda atari uwo gukundana”. Buri wese arimo mugenzi we umwenda wo kumugarura mu nzira nziza igihe cyose yacumuye.

Yezu uzi kamere muntu, ateganya ko ushobora kwegera umuvandimwe wawe akakunaniza. Yezu ntatubwira guhita tumuvanaho amaboko dore ko n’ubundi atadusaba gutsinda ahubwo adusaba kugerageza. Hari andi mahirwe atanga. Yagize ati “ natakumva uzashake umuntu umwe cyangwa babiri, kugirango ibyo bikiranurwe n’abagabo babiri cyangwa batatu”. Ndetse yongereyeho ati “ niyanga kumva abongabo ubibwire ikoraniro”. Yezu ntashaka ko hagira umuntu n’umwe wazimira. Yezu yabwiye ariya magambo abigishwa be nyuma yo kubacira wa mugani w’intama imwe izimira, maze umushumba agafa icyemezo cyo gusiga za zindi mirongo icyenda n’icyenda, akajya gushaka ya yindi imwe gusa. Ibyo biratwumvisha ko umuvandimwe watannye aba ameze nka ya ntama yazimiye.

Bavandimwe, nibyo koko kubana kivandimwe, mu ituze, ubworoherane no mu mahoro, haba muri sosiyete cyangwa se muri Kiliziya bisaba ko buri wese abigiramo uruhare. Ntawe ukwiye kwigira indorerezi cyangwa se ntibindeba cyangwa se kamara. Mu miryango yose abantu ni magirirane kandi baruzuzanya. Muri uko kunganirana, hari ubwo sekibi ababibamo urunturuntu, amacakubiri cyangwa amakimbirane. Uhoraho aduhamiriza ko uwegereye umuvandimwe we uri mu ikosa cyangwa mu cyaha akamuhana, akamukosora yiyoroheje kandi atamwandagaje aba akijije ubugingo bw’uwo muvandimwe. Yezu anashimangira ko aba anamubohoye mu isi no mu ijuru. Yezu yaduhaye ububasha bwo gucagagura ingoyi z’icyaha no kubohora abandi bakaba abigenga mu ngoma y’ijuru. Kuzimura, kuvugaguzwa, guteranya, gutaramana mu bandi uwacumuye, kwandagaza umunyabyaha, gusebanya, kwenyegeza umuriro w’urwango, gukabiriza icyaha cyagaragaye ku wundi, guca igikuba no kwicecekera ukarebera, ukareka uri mu kibi akakirundukiramo…ibyo bifatwa imbere y’Imana nk’ubugambanyi, ubwicanyi n’ubugiranabi!

GUKOSORA NI UKUGARURA UWAZIMIYE SI UKUMWANDAGAZA

Birakomeye bavandimwe, kandi nkuko twabibonye ubutumwa bwo gukosorana burareba buri wese nta n’umwe usigaye guhera ku kibondo kugera ku kibando. Bityo rero tuzabazwa byinshi imbere y’Imana niba: hari abarenganywa tukinumira; niba hari abavandimwe tuzi babana nabi duturanye ntitugire icyo dukora ngo tubunge; niba hari abapfira mu bupagani no mu byaha ntitubamenyeshe Yezu Kristu mu mvugo n’urugero rwiza ruranga ababatijwe; niba dushyigikira ikinyoma cyangwa niba tukibona tukinumira tuzabibazwa n’Imana yo Mucamanza w’ikirenga kandi utabera! Kiliziya, ni ukuvuga ababatijwe twese dufite ubutumwa bukomeye bwo kwegera abantu bose, baba abategetsi baba abayoborwa tukabahwitura igihe barimo gutandukira cyangwa se kuyoba. Ibi ariko bisaba kwambaza no kumvira Roho Mutagatifu kugira ngo aduhe imyitwarire, imvugo n’uburyo buhwitse bwo kugorora, kunga no guhwitura no kwegera abo bose.

Bavandimwe, nk’abemera dukwiye guhora  dushimangira ko muri Kiliziya turi abavandimwe. Buri wese nabere undi umurinzi, amurinde icyaha n’urupfu rwacyo, amugeze kuri Yezu Kristu. Tuzirikane ko nta kwibeshya ngo twaba abatagatifu twahunze Kiliziya n’abayo. Hari abibeshya ko bashobora kuba beza basengeye iwabo mu ngo, ibya Kiliziya ntibabikozwe! Yezu yagennye ko Umuryango-Kiliziya-uba urubuga rudasumbwa tuboneramo umukiro n’ubuzima bwuzuye bw’Imana. Ni muri Kiliziya duhamirizamo ko turi abavandimwe n’abasangira-ngendo Kristu abereye umutwe. Muri Kiliziya ni ho Yezu atuye mu bavandimwe bahura barenze umwe bagasengera hamwe, bagasaba Data icyo bashaka. Data agaba byose no kuri bose abinyujije muri Kiliziya. Byongeye muri Kiliziya basangira byose mu izina rya Yezu Kristu, akaba ari no muri yo bahabwa ubutumwa bwo kunga no kurokora bagenzi babo baguye mu cyaha. Turamenye nitwumva ijwi ry’Imana rivugira muri Kiliziya, ntidukomeze kunangira imitima yacu, twemere maze dukire.

Nyagasani Yezu nabane namwe!.