INYIGISHO YO KU CYUMWERU CYA MBERE CY’ADIVENTI, UMWAKA A

Bakristu bavandimwe , Kristu Yezu akuzwe,

Twinjiye mu gihe cya Adventi. Adventi bikavuga gutegereza. Umubyeyi wacu Kiliziya iduteganyiriza icyo gihe mu mwaka wa Liturujiya ngo tuzirikane ko dutegereje. “Turi abategereje Umukiza“. Uyu munsi  Ivanjili iratubwiriza kuba maso. Nta gushidikanya  benshi muri twe tumaze guhimbaza Adventi nyinshi. Tukamara ibyumweru   bine mu gihe cyitwa Adventi. Turi abategereje : Dutegereje iki? Hari igihe twihenda tukibwira ko dutegereje Umunsi mukuru wa  Noheli bityo tukaba ntaho twaba dutaniye n’abandi bose yemwe batangiye mbere ya Adventi kwitegura Umunsi Mukuru wa Noheli ku buryo bwabo. Ivanjili y’uyu munsi iratubwira uburyo Umwana w’Umuntu azaza atunguranye, ikatugira n’inama y’uko tugomba kwitwara. Iki gihe cya adventi kikatwibutsa cyane cyane iby’ihindukira rya Nyagasani. Ni akanya ko kwibuka ko dutegereje cyangwa duteze iryo hindukira rya Nyagasani. Nibyo ntawe uzi umunsi n’isaha Nyagasani azagarukiraho twibuke ko hari imperuka rusange hakaba n’imperuka ya buri wese. Ntawuzi igihe azapfira.

Kuri iki cyumweru kandi muri Kiliziya yo mu Karere k’Ibiyaga Bigari “ACEAC“ ni ukuvuga u Rwanda, u Burundi, na Repubulika iharanira Demokarasi ya Kongo aba ari niumwana wo gusaba Amahoro, Ubutabera n’ubwiyunge nk’uko byasabwe n’inama y’abepiskopi bo muri ibyo bihugu mu nama yabo yo kuwa  13-18/05/2002.

1. Guhamagarirwa kuzamuka ku musozi w’Uhoraho mu gihe cya Adiventi

 Iyo umuntu ategereje umushyitsi ukomeye, iyo umuntu ategereje inshuti afite uko yitwara afite uko yifata.  Inzu ye arayitunganya akisukura n’ibindi. Iyo umuntu ategereje inshuti ye ikomeye agakomye kose akitiranya n’intambwe z’uwo mukunzi uje . Buri mwanya amaso ayahanga amarembo n’ubwuzu bwinshi ngo amubone yinjira. Umutima ntutuza ntujya hamwe. Ndahamya ko ibyo buri wese byamubayeho inshuro irenze imwe cyangwa bizamubaho. Ibyo nibyo Yezu adusaba gutegereza kuko tutazi umunsi n’isaha. “Mwitonde, mube maso“.

Amasomo matagatifu ya none ndetse n’ayo tuzazirikana muri iki gihe cyose cya Adiventi, ni amasomo adufasha kwitegura no guha umwanya ukwiye Yezu Kristu twizihiza ivuka rye ku munsi wa Noheli. Noheli ikazaba kwizihiza Yezu waje muri iyi si akigira umuntu, Yezu uza buri munsi muri twe, Yezu uzaza mu ikuzo, ari na we amasomo yo kuri iki cyumweru atwibutsa : Yezu azagaruka; dutegereje amaza ye kandi tuyitegura dukomeje iminsi yose y’ubuzima bwacu.

Ni bwo butumwa umuhanuzi Izayi atugezaho mu isomo rya mbere. Iyi nkuru yayanditse mu gihe bizihizaga umunsi mukuru w’amahema, bibuka ingando z’abahebureyi kuri Sinayi. Mu kwizihiza uyu munsi mukuru, baragendaga bakamara iminsi umunani barara mu mahema. Muri iyo minsi rero, umurwa wa Yeruzalemu wabaga urimo imbaga y’abantu benshi, baturutse impande zose. Umuhanuzi Izayi we, iryo teraniro cyangwa iyo mbaga yabonye ko ishushanya iyindi yisumbuyeho. Umunsi uzagera ubwo abantu bose bazahurizwa hamwe. Ingoro izaba ahantu amahanga yose azahurira, abantu bose bumve inkuru nziza y’urukundo rw’Imana.

Birumvikana ko dutangiranye iki gihe gikomeye cya Adiventi n’umuhanuzi Izayi utubwira umwijima ubundikiye isi ariko agasaba abantu kudacika intege kuko hari ubwo abantu b’ibihugu byinshi bazahaguruka bagira bati «Nimuze tuzamuke tujye ku musozi w’Uhoraho, ku Ngoro y’Imana ya Yakobo. Azatwereka inzira ze tuzikurikire.». Iyo mpuruza rero natwe iratureba : « Nimuze tuzamuke umusozi w’Uhoraho ».

Muri Bibiliya, umusozi ushushanya ahantu hari Imana. Niba rero umuhanuzi adushishikariza kuzamuka umusozi w’Uhoraho, aragira ngo tugane Imana, tujye guhura n’Imana, twigomwe ibiduhangayika byo ku isi tujye gushaka ibyishimo mu Mana. Muri iki gihe cya Adiventi, duhamagarirwa kurushaho guha Imana umwanya w’ibanze mu buzima bwacu. Ni yo nzira yonyine izatugeza mu bugingo bw’iteka, kuko nidukomeza kwizera ubwenge n’ubuhangange bwacu katubayeho nta kabuza. Amateka y’isi agaragaza ko uko muntu yagiye ahunga Imana ariko yagiye asakirana n’ibyago by’uruherekana, mbese ni ukugwa mu rwobo rutagira indiba nkuko Bikira Mariya ikibeho yabitwibukije ko nitutagarukira Imana ari uko bizatugendekera maze imibereho yaho ikarushaho kuba umwaku!

Koko rero, Umuhanuzi Izayi aravuga aya magambo mu gihe isi yari yugarijwe n’umwijima w’inzangano n’intambara, umwijima w’urupfu n’ubugizi bwa nabi, imiryango isubiranamo, n’ibindi bibi byinshi. Ibyo birumvikana ko ubwo butumwa no muri iki gihe butureba.

Ni muri ayo makuba akomeye Umuhanuzi agira ati nimurekere aho kugira nabi, nimusubize inkota mu rwubati mwemere kumurikirwa n’urumuri ruturuka kuri Uhoraho. Izayi arifuza ko amategeko y’Uhoraho ariyo akurikizwa kandi amategeko y’abantu akamurikirwa n’ugushaka kw’Imana kuko ari yo yonyine Nyirububasha na Nyirimpuhwe naho muntu rimwe na rimwe akaba ahubuka kandi akaba yarenganya. Niyo mpamvu abwira amahanga ko kuzindukira ku musozi w’Uhoraho bitanga amahoro y’umutima kandi bikayaha n’abavandimwe kuko abiyemeje bose kugana iyo nzira “inkota zabo bazicuramo amasuka, amacumu yabo bakayacuramo ibihabuzo. Ihanga ntiryongere gutera irindi inkota, kandi ntibongera ukundi kwiga kurwana”, kuko bahitamo kugendera mu rumuri rw’Uhoraho. Iy’aba izi nama nziza Umuhanuzi Izayi atugira twemeraga zikinjira mu mitima yacu, maze mugenzi wacu tukamubonamo umuntu, umuvandimwe tugomba kubaha no guha amahoro, umuntu dusangiye gupfa no gukira, umuntu dusangiye urugendo rugana aho Imana ishaka, isi yatuza kandi ikagira amahoro.

2. Kwiyambura ibikorwa by’umwijima no kumenya ko umukiro utwegereye

Bavandimwe, ubwo butumwa niyo nkuru nziza Mutagatifu Pawulo intumwa atugezaho mu isomo rya 2, ritwibutsa ko umukiro wacu utwegereye. Umugambi Imana idufiteho ni ntahindurwa. Kenshi na kenshi twirebera ibitagenda, ni yo mpamvu Pawulo intumwa ashaka kudufasha kwakira Ingoma y’Imana muri iyi si. Umukristu agomba kubaho azirikana umunsi wa Nyagasani wegereje kuko uko bucya haba havaho umunsi umwe. Akamagana ibikorwa by’umwijima, akirinda ibyo byose binyuranyije n’ukwemera Kristu. Kubyubahiriza rero birasaba kuba maso. Ni na byo Yezu adusaba mu Ivanjili ya none ati « Nimube maso » . Aratubwira  ati: “iyaba nyir’urugo yamenyaga igihe cy’ijoro umujura azaziraho, yabaye maso maze ntareke bamupfumurira inzu. Namwe rero nimube maso, kuko Umwana w’umuntu azaza igihe mudakeka”. Yezu arashaka kutwereka ko Imana yinjira mu mateka yacu, mu buzima bwacu itabanje kuvunyisha kuko ujya iw’umukunzi atabanza guteguza kuko aba zi ko yisanga. Ikibazo ni uko twe abantu turangariye muri byinshi bituma twica amatwi igihe Nyagasani akomanze. Turangariye mu mashyari no mu nzangano, turangariye mu gutunga byinshi kabone n’iyo twabibona tunyanganyije, twibwira ko isi n’Ijuru ari ibyacu kandi ko bigomba kutwumvira. Yezu Kristu ati: “murabe maso”: Nitwige rero gukingura amaso yacu kugira ngo tubashe kubona icyo Imana idushakaho, nitwige gufunguura amatwi ngo twumve neza aho kumvirana kugira ngo tumenye iyo tuganisha ubuzima bwacu.

Mu gushyira mu bikorwa ibi Yezu Kristu adusaba, icyo dusabwa cyane ni ubwitonzi n’ubushishozi. Dusanzwe tubizi iyo umuntu atwaye imodoka ntabe maso, ntashishoze akarangara cyangwa agasinzira akora impanuka. Natwe abakristu, tugomba guhora turi maso, ibitekerezo byacu, ubuzima bwacu bwose n’umutima wacu wose bigahora birangamiye Nyagasani ugiye kuza.

3. Kuba maso mu isi irangwa n’Induru nyinshi: Urugero rwa Nowa

Hari abakwibaza aho ubwitonzi bwava muri iyi si yiruka amasigamana. Twakwitonda dute kandi tugomba guhiga ifaranga hasi kubura hejuru. Twakwitonda dute n’ibishashagirana by’iyi si? Kandi tugomba  kwiryohereza kuko iterambere ryatuzaniye byinshi byiza. Muri make hari byinshi byadutwaye bitubuza kwitonda. Yezu ati: ‘No mu gihe cyaNowa niko byari bimeze.”

Kugira ngo tubashe kubyumva neza, Yezu atwibukije inkuru ya Nowa, ati: Mbere y’umwuzure, abantu bararyaga, bakanywa, bagashyingirwa. Byose byari ibisanzwe ntibumve impamvu Nowa abasaba kubaka ubwato. Bari barangariye mu byabo. Ibi ni nabyo natwe bikunze kutubaho tukarangara, tukibera mu byacu bisanzwe by’ubuzima, tukibagirwa Imana. Uyu munsi turasabwa kuba maso, Yezu Kristu aratwibutsa ko agiye kuza we wadukunze urukundo rutagira imipaka akomeje kandi kudukunda akaza muri twe. Igihe cya Adiventi kiradushishikariza uko kumutegereza. Uko kumutegereza gukorwa mbere na mbere mu isengesho nk’uko Yezu yabivuze mu murima w’imizeti mbere y’ibabara ati « Nimube maso kandi musenge ». Ntibyoroshye kuba maso waguye agacuho,kubera bya bindi byose bituma udatuza. Kuba maso si ibyo kudasinzira ni ikigereranyo cy’uko tugomba kwitwara kuri roho zacu. Ni ukwigiramo Yezu Kristu , ni ukuba hamwe na Yezu mu byo dukora byose. Iyaba twagiraga amahirwe yo kwibaza buri mwanya niba turi kumwe na Yezu. Mbere yo kuvuga ibyo ugiye kuvuga wabibwira Yezu, ibyo ukora uri kumwe na Yezu cyangwa ntushaka ko abimenya. Ibyo nibyo bidusinziriza. Pawulo intumwa ati “ Aya magingo tutimo ni igihe cyo gushiguka mu bitotsi …” (Rom 13,11), hanyuma akadusaba kugenda ahabona nta bikorwa by’umwijima. Muri make ati “ Ntimukishinge umubiri ngo mukore ibyo wifuza (Rom 13,14). 

4. Adiventi ni umwanya wo kwisuzuma no kwivugurura mu rugendo rugana Imana

Bavandimwe, Amasomo yose y’iki cyumweru aratuganisha mu cyerekezo cyo gutegereza umukiza. Dukomeze rero gutegura guhura na Nyagasani, tumutegurire imitima ikeye, yuzuye ukwizera n’urukundo.

Yezu ntiyifuza ko twiberaho nko mu gihe cya Nowa, arifuza ko impano y’ubuzima yaduhaye tutayangiza ngo tuyandavuze. Arifuza ko amagambo ya Pawulo intumwa twajya duhora tuyazirikanaho niba dushaka kuba urumuri rw’isi. Pawulo ati: “mumenye ko aya magingo turimo ari igihe cyo gushiguka mu bitotsi… Nitwiyake rero ibikorwa by’umwijima maze twambare intwaro z’urumuri. Tugendane umurava nk’abagenda ku mugaragaro amanywa ava, nta busambo, nta businzi, nta busambanyi, nta biterasoni, nta ntonganya, nta shyari. Ahubwo nimwiyambike Nyagasani Yezu Kristu”. Ese, tujya twibuka ko aya magambo atureba, atareba gusa abanyaroma Pawulo yandikiye iyi baruwa? Uyu munsi erega nitwe banyaroma abwira!

Adiventi dutangiye, itubere igihe cyo guhagarara akanya gato maze turebe iyo tugana mu buzima bwacu bwa buri munsi no mu mubano wacu n’Imana ndetse n’abavandimwe. Nibyo koko iki gihe cya adventi ni umwanya buri wese ahawe wo kongera kwisuzuma ngo arebe uko ahagaze. Byagenda bite isi irangiye none? Witeguye gutaha none?  igihe cyawe ni iki ngiki, umunsi wawe ni uyu munsi. Icyo ubasha gukora none ushaka kwinjira mu nzira y’ubutagatifu wigishyira ejo.

Iryo jwi rikubwira ngo ba witonze uzaba uhinduka uzaba ureka ingeso iyi n’iyi ni irya Sekibi, ni ijwi rigusinziriza ridashaka ko wicura, ridashaka ko uba maso. Kanguka ufate ibyemezo ukore gahunda nshya. Uyu munsi dutangiye umwaka mushya wa Liturujiya ntuzakubere nk’indi yarangiye. Ngo bibe ibisanzwe, duhinduke nkuko Umubyeyi Nyina wa Jambo akomeze kubiduhamagarira i Kibeho, dore ko tukiri mu mpumeko yo kwizihiza isabakuru y’amabonekerwa ya kibeho twizihije kuwa 28 Ugushyingo. Twishakemo  imbaraga nshya. Iki gihe kitubere icyo kuvugurura ubukiristu bwacu tureka ibidatunganye mu mibereho yacu.

Nyagasani Yezu nabane namwe!