ISHAPURE Y'UBUBABARE BURINDWI BWA BIKIRA MARIYA

INTANGIRIRO: Mana yanjye ngutuye iyi shapule y’ububabare Kubera ikuzo ryawe litagatifu, ngo nubahe umubyeyi wawe mutagatifu, mu kuzilikana no gusangira nawe ububabare bwe. Ndakwinginze, umpe kwicuza ibyaha nakoze, Umfashe kwitonda, no kwicisha bugufi ngomba Ngo nshobore kuronka indulgensiya zose ziyilimo.

- Isengesho ryo kwicuza ibyaha:

Nyagasani, ibyaha nakugiliye byose ndabyanze, kuko binteranya nawe, bikadutandukanya ari wowe untunga ukandengera iteka, kandi ndabyangira yuko byicishije Yezu Kristu Umwana wawe ukunda, Dawe ubinkize sinshaka kubisubira, ndashaka kuba uwawe, Amina.

- Ndakuramutsa Mariya x3

- Mubyeyi ugira ibambe, ujye utwibutsa iminsi yose ibyababaje Yezu

1. Igihe Yezu yitanze, adupfira i Kaluvariyo wari umuri iruhande.
2. Wabonye yenda kwitanga, Yezu wari umwana wawe, yari n’Imana yawe

-Ububabare bwa mbere: UMUSAZA SIMEONI AHANULIRA BIKIRA MARIYA IBIZABABAZA UMUTIMA WE (Lc 2, 34-35).

Mana ihoraho kandi ishobora byose, wowe nyir’impuhwe zahebuje, tugutuye igitambo cy’umwana wawe ukunda byimazeyo cyumvikanye mu magambo y’umuhanuzi Simeoni, igihe Yozefu na Bikira Mariya bamugutuye mw’i Hekaru. Ubwe akakwihaho igitambo aricyo cyazahuye isi yose. Tukigutuye twifatanije n’umutima utagira inenge wa Bikira Mariya, wahuranijwe n’inkota mu rupfu rw’umwana we, kugira ngo aduhongerere ibyaha byacu n’iby’abantu bose. Na we Bikira Mariya wamenyeshejwe ibyago uteganilijwe, ugahora ubizilikana mu buzima bwawe utinuba; twigishe gutinya ikidutandukanya n’Imana, no kwemera ko ibyago aliyo nzira y’ukuri. Ubumbatire imitima yacu igihe tuli mu byago, twoye guhugira mu biremwa, twibere mu gituza cyawe wowe watubereye ikiramiro.

Dawe uli mu Ijuru...

Ndakuramutsa Mariya 7;

Mubyeyi ugira ibambe, ujye utwibutsa iminsi yose ibyababaje Yezu.

3. Washakaga ko azakira, maze kuko wadukunze, wemera ko adupfira.
4. Ni ibyaha byacu yazize, Nitwe twese yapfiriye, ngo abone uko adukiza.

-Ububabare bwa kabiri: YEZU BAMUHUNGISHIRIZA MU MISIRI (Mt2, 13-Mt2, 19-20).

Dawe Data Nyirubutagatifu, wowe wohereje umumalayika wawe kumenyesha Yozefu na Bikira Mariya ko Herodi ashaka kwica Umwana wawe, Tugutuye ububabare bw’Umutima wa Yezu n’intimba y’umuryango mutagatifu wagiliye muli ako gakubuzo uhunga uwo mubisha wali ugambiliye kwica umwana wawe. Mana yacu, wowe utatereranye uwo muryango wawe, tubigutuliye kugirango imiryango yose iyoboke Umwana wawe, kandi ikugire amahungiro. Hindura umuco w’abafite inkota yo kwica ubuzima bw’abandi, imitima y’abantu bose igire urukundo rwa kivandimwe. Bikira Mariya Nyir’impuhwe, wabyutse igicuku cyose ukagenda uhungishije umwana wawe, ntiwibagirwe ko ali twe, twaguteye uwo muruho, twigishe kwicisha bugufi igihe tubyutswemo n’ishema ryo gukandagira abo turusha amaboko; tumenye guhunga intambara zituma tugomera Imana, Umwana w’Imana yibere muli twe. Hosha intambara z’urudaca z’abarwanilira amakuzo, amahoro asendere mu mitima ibe ingoro y’Imana muli iyi si. Amina

Dawe uli mu Ijuru...,

Ndakuramutsa Mariya 7,

Mubyeyi ugira ibambe jya utwibutsa iminsi yose ibyababaje Yezu

5. Ninde utagira ishavu, yibutse Nyina wa Yezu, aririra umwana we.
6. Ayo mahwa akarishye, batamirije Umwana we, yayumvaga amahuriro.

-Ububabare bwa gatatu: IBYABABAJE UMUTIMA WA MARIYA IGIHE YEZU AZIMIYE (Lc 2, 41-51)

 Mana ihoraho, gilira intimba Bikira Mariya yagize igihe abuze umwana we; reba uruzerero rwe abaririza mu mihana y’abaturanyi be ntarambirwe kandi ishavu ryamushenguye. Ubabarire ababyeyi bose bashavujwe n’imyifatire mibi y’urubyaro rwabo; ubabalire n’ababyeyi batita ku bana babo. Toza ababyeyi kwita ku bana babo, babatoze kwibanda mu mirimo ihesha izina ryawe ikuzo, nk’uko Yezu Umwana wawe atarambiwe gusigara mw’i Hekaru asobanura amahame y’ubukuru n’ububyeyi bwawe wowe Mana yacu. Yezu rugero rw’ubutungane, igisha abantu bose kwumvira, nk’uko wumviye Bikira Mariya igihe agusanga mw’i Hekaru; ukamwumvira mu buzima bwawe bwose, kugeza mu ndunduro y’ubuzima bwawe hano mu nsi. Amina

Dawe uli mu Ijuru…;

Ndakuramutsa Mariya 7;

Mubyeyi ugira ibambe jya utwibutsa iminsi yose ibyababaje Yezu

7. Bakibamba Yezu Kristu, bamushingamo imigera, Mariya arikanga.
8. Mariya arashiguka, umusaraba wa Yezu, witikuye mu rwobo.

-Ububabare bwa kane: BIKIRA MARIYA AHURA NA YEZU AHETSE UMUSARABA.

Nyagasani nyir’impuhwe, wowe nyirubuntu guhebuje, waduhaye umwana wawe ngo atubere igitambo kitugarura mu mukiro w’ingoma yawe, twali twaranyagishijwe n’umwanzi. Na we akakwumvira kugera ubwo yishyize mu maboko y’abishi be. Girira ziriya mvune aterwa n’umusaraba wamushenguye, yemeye gutsindagiramo ibyaha by’abantu bose ngo abyuhagize amaraso ye; girira ishavu yagiranye n’Umubyeyi igihe bahuriye mu nzira ahetse umusaraba, inkora y’amaraso imuranga mu nzira hose; ubabalire abanyabyaha b’amoko yose, ubahe ukwicuza gushyitse; ubahe kuyoboka Umucunguzi bamubonemo impuhwe zawe n’urukundo udukunda byahebuje wowe Mana yacu. Nyagasani, abari mu byago bahe kumenya ko umusaraba ariwo mukiro, biyumanganye boye kuguhunga bashakira ubuzima mu manjwe. Yezu na Mariya, nimugilire intimba y’umutima n’umubabaro twabateye, muhe ubwenge bwacu kumenya ko ari mwe gakiza ka bene muntu, bose bamenye Se wabahaye ubuzima, baharanire kuzagera mu mukiro w’ingoma ye, Yezu yabaronkeye. Amina

Dawe uri mu Ijuru...;

Ndakuramutsa Mariya 7;

Mubyeyi ugira bambe jya utwibutsa iminsi yose ibyababaje Yezu

9. Yababaye yumva Yezu, Amuraga abantu bose, ngo babe ingurane ye.
10. Yabonye Umwana w’Imana, Rubanda bamwanga bose, bamushinyagurira.

-Ububabare bwa gatanu: BIKIRA MARIYA AHAGAZE MUNSI Y’UMUSARABA WA YEZU.

Nyagasani Yezu, tugutuye ishavu ryashenguye Umubyeyi wawe aho yali ahagaze mu nsi y’umusaraba, amaraso akuvamo amushokeraho, yumva agashinyaguro n’ibitutsi abanzi bawe bagutukaga; areba umanitswe hagati y’isi n’Ijuru ngo ubihuze. Nibwo wamuduhaye burundu, nk’uko So yavuze mu gihe cy’ubucumuzi abwira ya nzoka ko ayiziranije n’umugore uzayimena umutwe. Nyagasani Yezu, aho niho waciye inzigo icyaha cyari cyarashyize hagati y’Imana na muntu. Nibwo werekanye umugore So yavuze igihe wabwiraga Bikiramariya uti: "Mugore dore umwana wawe. ", ubwira Yohani uti: "Mwana, dore nyoko". Duhe kuyoboka Umubyeyi wawe, wowe na So mwaduhayeho inshumbushanyo. Dawe Data nyir’impuhwe zahebuje, ha imiryango yose uragiriye mu isi y’ubu kugira ubumwe bw’indatandukana, abantu bose bahuzwe n’urukundo rwa kivandimwe, Umucunguzi n’Umubyeyi we berekaniye mu bubabare bwo gukiza abantu bikozwe n’izo ndacumura. Bikira Mariya Mizero yacu, ramira abanyabyaha bari mu mpande zose z’isi y’ubu, bibuke ko bacunguwwe bagarukire Imana, bicuze babe nabo inkoramutima zawe. Amina

Dawe uli mu Ijuru…;

Ndakuramutsa Mariya 7;

Mubyeyi ugira ibambe jya utwibutsa iminsi yose ibyababaje Yezu

11. Wababajwe n’uko Yezu, bamuhinduye ruvumwa, atagira umuhoza.
12. Mubyeyi ufite intimba, unyumvishe uko wababaye, igihe Yezu apfuye.

-Ububabare bwa gatandatu: BIKIRA MARIYA YAKIRA UMURAMBO WA YEZU MU MABOKO YE.

Mana yacu, gilira ishavu ryashenguye umutima w’Umubyeyi w’Umwana wawe, igihe yakiraga umurambo w’imfura ye imaze guca. Rebana impuhwe zawe zahebuje iryo shavu ry’Umubyeyi n’urupfu rw’umwana wawe; aho bikomoka ni ku bucumuzi bwacu. Na we kandi wanyuzwe n’ukumvira k’Umwana wawe. Na we yemeye kwitanga ubutibabalira ngo akize bose. Akira amasengesho yacu tuguturiye abanyabyaha; gilira ibikomere by’Umwana wawe uko ali bitanu; ugilire n’umutima wa Bikira Mariya washenguwe n’ishavu yakira umurambo w’umwana we; uhindure imitima y’abanyabyaha, urebe mu mpande zose z’isi,.no mumoko yose, mu bitsina byombi. Natwe tugusabye imbabazi z’ibyaha byacu bwite. Mana yacu gira ubuntu wumve amajwi yacu agutakambira. Bikira Mariya mizero y’abanyabyaha, ibuka ibyago by’iyi si wavutsemo, ukayituramo; wihunza umusaya, twumve twe abo wabyaye. Akira roho zacu zahotowe n’ingoyi y’ibyaha; zikure mu maboko ya shitani, no mu mwijima w’icyaha. Amina

Dawe uli mu Ijuru…;

Ndakuramutsa Mariya 7;

Mubyeyi ugira ibambe jya utwibutsa iminsi yose ibyababaje Yezu

13. Dutoze gukunda Yezu, Twibuke ibyamubabaje, duhimbaze kuba abe.
14. Twese igihe tuzapfira, uzamuduhakirweho, yoye kuzadutsinda.

-Ububabare bwa karindwi: BIKIRA MARIYA ASHYIRA UMURAMBO WA YEZU MU MVA.

Bikira Mariya amaze gusasira umurambo wa Yezu, aworoshe, we, n’abakunzi ba Yezu, Yozefu na Nikodemu, imva bayikingishije ibuye rinini. Bikira Mariya arikubura arataha yashenguwe n’inyanja y’ububabare.

Mana yacu, wowe udukunda byahebuje, tugutuye umubili w’Umucunguzi wacu wishwe rubi abambwe nk’umugome; ugashyingurwa mu mva amaze kuwuguhaho igitambo n’impongano; ariwo yaduhayeho umurage tuzahora tuguturaho igitambo iteka; akawuduhaho ifunguro lidutungira ubuzima bwa roho. Tuwuguturanye n’ububabare bwashenguye Umubyeyi we mutagatifu, kuko Yezu umwana we yahetse umusaraba ku rutugu; Umubyeyi we akawuheka ku mutima. Akirana impuhwe zawe Mana itanga abo waremye, iyo mibabaro tugusabisha twebwe abanyabyaha kugira ngo isengesho rya Yezu rigere ku ndunduro y’icyo ryasabye igihe yavugaga ati : »Dawe, ndagusaba ngo abo wampaye babe umwe muri jye nkuko ndi umwe na We. » Amina

Dawe uli mu Ijuru…;

Ndakuramutsa Mariya 7;

Mubyeyi ugira ibambe jya utwibutsa iminsi yose ibyababaje Yezu

15. Nimbona amakuba mu nsi, umpe uyemera rwose, abe icyiru cy’ibyaha.
16. Nawe Yezu Mwami wacu, girira umubyeyi wawe, wumve abo wapfiriye.
17. Uduhe kukuyoboka, tuzabone kuza iwawe, Mariya dusohoze.

GUSOZA: Mwamikazi w’abahowe Imana, Roho yawe yashengukiye mu nyanja y’ububabare, ndakwinginze kubera amarira wasutse muyi icyo gihe cy’amayoberane, undonkere hamwe n’abanyabyaha bose, ukwicuza gushyitse. Amina

MUTIMA WA MARIYA WABABAYE KANDI UTASAMANYWE ICYAHA, UDUSABIRE TWE ABAGUHUNGIRAHO (X3).