INYIGISHO YO KU CYUMWERU CYA 31 GISANZWE, UMWAKA C

Bavandimwe Kristu Yezu akuzwe, Amasomo matagatifu tuzirikana kuri iki cyumweru cya 31 Gisanzwe, umwaka C ; mu isomo rya mbere turabwirwa ukuntu Imana igirira bose impuhwe kuko ishobora byose. Mu isomo rya kabiri tuributswa ko kugira ukwemera byigaragaza mu bikorwa, Ivanjili ikatwereka Yezu utanena na busa, mu kugenderera Zakewusi.

Ni byo koko, Ushaka Imana iramwigaragariza nta kabuza gusumbya uko we yabyifuzaga.Urugero turarubona kuri Zakewusi wo mu ivanjili ya none. Ubuzima bwa Zakewusi, uko yari abayeho ntibwamuteguraga guhura na Yezu.

Ni byo koko Zakewusi yabonye ibitangaza by’Imana. Ivanjili ntabwo itubwira icyo Zakewusi yashakiraga kubona Yezu. Birashoboka ko yari amatsiko asanzwe cyangwa akaba yari yarumvise ibya Yezu Umukiza akaba yarashakaga kumubona ngo agire icyo amukorera nk’uko yakoraga ibitangaza aho yanyuraga hose. Ikigaragara nuko ubushake n’ishyaka yari afite bitaba byubakiye ku matsiko asanzwe gusa.

Kuba yari umukungu akaba n’umukozi w’abaromani birumvikana ko yari umunyacyubahiro muri Yeriko ntabwo byari byoroshye rero kugira ngo afate icyemezo cyo kurira igiti.

Ikigaragara nuko yari afite ubushake bwo kubona Yezu. 

Ubushake bwo guhura n’Imana mu mibereho yacu turabugira ni benshi rwose bifuza gutunganira Imana no kubaho nk’abakristu. Gusa kubyifuza ntibihagije hari n’umuhate wo kubigeraho. Uyu muhate ukajyana no gukoresha ubwenge,imbaraga n’ubushobozi byacu ngo duhure n’Imana ngo tugire Imana mu mibereho yacu.

Bavandimwe, burya hari imbogamizi nyinshi zitubuza guhura n’Imana. Kugira umuhate ntibihagije kuko duhura n’ingorane nyinshi. Duhereye ku rugero rwa Zakewusi twabona imbogamizi z’ubwoko bubiri nazo zabamo ibyiciro byinshi bitewe n’umuntu.

– Imbogamizi ziduturutseho twebwe ubwacu. Izi mbogamizi ni nazo zikomeye cyane. Burya n’ubwo akenshi impamvu z’ibitubaho tuzishakira ku bandi: abanzi, abagome…., impamvu zikomeye zatuma ibyo twifuza bidatungana, zituma duhura n’ibibazo ni izo twifitemo. Izo mpamvu twifitemo kuzimenya biratugora kuko twibabarira tukiburanira tukigira abere. Iyaba twashoboraga kwimenya tukamenye n’ibyatuyobya twifitemo, burya urugamba twarutsinda. Izo mpamvu z’ikibi zaba ingusho twifitemo, ingeso yatunaniye, imizi y’ibyaha yakuze muri twe mbese bikaba nka kamere ya kabiri. Zakewusi kuba yari mugufi ntibyari ikibazo kuko niko yari aremye.

–Imbogamizi ziturutse ku bandi. Birashoboka ko abandi, abo tubana inshuti zacu, abo mu muryango wacu, abo mu bwoko bwacu… batubuza kubona Imana. Bashobora kuba babishaka cyangwa batabishaka bitewe nuko babayeho.  Ibi nabyo bisaba kubibona ngo umuntu abirenge.

Birashoboka na none ariko ko tubuza abandi kubona Imana tukabarangaza, tukabajyana mu bindi. Tukabakingiriza twitwaje uko tureshya, uko tumeze, uko tubayeho….Zakewusi abarebare baramukingirije bituma yurira igite ari umuntu w’umugabo !  

Bavandimwe, Izi mbogamizi zombi tubonye haruguru, Zakewusi yakoze uko ashoboye arazirenga. Ibi yabishobojwe no kwiyakira no kwicisha bugufi, kureka ibyubahiro dore ko nabyo ari imbogamizi ikomeye. Yicishije bugufi afata icyemezo cyo kurira igiti kandi yari umunyacyubahiro. Nuko Yezu wabonaga ibyo byose, amukorera ibitangaza.

Zakewusi wateganyaga kureba Yezu gusa, Yezu aramuzi amuhamagaye mu izina rye, amuhaye icyubahiro cy’ukuri, guhamagarwa na Yezu mu izina mbega igitangaza ! Ntabwo aramureba umwanya muto ahubwo ararara iwe, amuvugishe amukoreho amwakire uko ashoboye. 

Zakewusi wari umunyabyaha kandi abizwiho na rubanda , Zakewusi wari uzi ibyaha bye afashe ibyemezo byo guhinduka. 

Ibyaha bya Zakewusi birimo kimwe kandi gikomeye ari cyo kubura urukundo. Hakaba kwirengagiza abakene no guhuguza abandi. Guhura na Yezu bimweretse icyo gukora. Yari yarazimiye none agarutse ibuntu. Ni byo koko kubura urukundo ni ugupfa uhagaze. Urukundo rw’abantu bose. Kubura urukundo ni ukubura icyingenzi. Kwirengagiza abo twakagombye gufasha ni icyaha, guhuguza iby’abandi, gutwara ibitari ibyawe niyo wakoresha mudasobwa n’ikoranabuhanga ni icyaha. Hari ubwo twibwira ko abiba ari abakora mu mufuka. Abakoresha ikoranabuhanga tukabita abahanga. Zakewusi ntawe yari yarakoze mu Mufuka ariko ntibyamujije kuba umwambuzi ruharwa ariyi mpamvu yihannye atibabariye imbere ya Yezu Kristu.

Bavandimwe, Imana ihora ituburira itwibutsa ibidutera gucumura, kugira ngo twigobotore ikibi maze twemere uko igitabo cy’ubuhanga cyabitwibukije.  Dusabe ngo natwe uko duhura na Yezu Kristu mu Ukaristiya  hagire benshi twisubiraho dufate ibyemezo byo guhinduka nuko ya Mahoro tudashobora kubona ahandi adusakaremo kandi natwe tuyasakaze mu bandi.

Nyagasani Yezu nabane namwe!