INYIGISHO YO KU CYUMWERU CYA 3 CYA ADIVENTI A

Bavandimwe Kristu Yezu akuzwe, “Nimwishimire muri Nyagasani, nongere mbisubiremo, nimwishime”. Iyi ni yo nteruro y’iki cyumweru cya gatatu cya Adiventi, cyitwa Gaudete, icyumweru cy’ibyishimo, ibyishimo by’uko Umucunguzi ari hafi. Nitwishime tunezerwe, dore Nyagasani Imana yacu aje kudukiza. Ni umusogongero w’ibyishimo tugomba kugira kuri Noheli. Ibyishimo duhimbaza, ni ibituruka ku Mushyitsi muhire uje muri twe, iwacu, mu byacu, nta na kimwe yihungije cya muntu uretse icyaha. Uwo ni Yezu Umwana w’ Imana uje kudukiza akabi kose.

Iki cyumweru cya gatatu cya Adiventi, cyitwa icyumweru cy’ibyishimo. Niba twishimye nta kindi kibidutera, ni uko Nyagasani aje muri twe. Yezu aje atugana, Yezu aje kudukiza, Yezu aje kutubwira ati: “mwigira ubwoba, ndi ku mwe namwe”. Ukuza kwe mu isi ni isoko y’ukwizera. Iyi nkuru nziza, ni yo dusanga mu masomo ya none, amasomo atwereka ko Imana idukiza ikibi. Imana ifitiye urukundo abakene, abaciye bugufi n’abatereranywe.

IBYISHIMO BY’UMUKIRO W’IMANA BIRI MU MASOMO YA NONE

Ibi byishimo ni byo umuhanuzi Izayi yahanuye ahumuriza umuryango w’Imana wari umaze kwiheba, ati : “Ubutayu n’ubutaka bubi nibihimbarwe, amayaga anezerwe kandi arabye indabyo, nasabagire abyine kandi atere urwamo rw’ibyishimo. Nimukomeze amaboko yananiwe, mutere imbaraga amavi adandabirana, mubwire n’abakutse umutima muti nimukomere, mwoye gutinya, dore Imana yanyu ije kubakiza. Mu isomo rya mbere, umuhanuzi Izayi araduhishurira ibitangaza by’umukiro ugiye kuza. Atangarije   umuryango w’ Imana ko Imana ikiwufiteho umugambi w’ umukiro.

Bari mu buhungiro, mu kaga no mu bucakara bamazemo imyaka 40!  Bahebeye urwaje! Ngo akaje karemerwa. Izayi aba arabatunguye, ababwira ko Imana imutumye: “ nimukomere mwoye gutinya…dore Imana yanyu …iraje Ubwayo kubakiza…Abacumbagira bazasimbuke nk’ impara…batera urwamo rw’ibyishimo”. Iyi nkuru nziza yabateye ibyishimo n’amizero. Bashonje bahishiwe. Umuhanuzi Izayi, uririmba ibi byishimo by’ukugaruka k’Umuryango wa Israeli mu gihugu cyawo cya Palestina uvuye mu bucakara bw’i Babiloni aho wari warajyanywe bunyago mu mwaka wa 586 mbere ya Yezu Kristu, igihe Umwami Nabucodonosor yasenyaga Yeru­zalemu, aratugaragariza ko Imana ari umushobora byose, ko yemera kugendana natwe, ikinjira mu gihe no mu mateka yacu maze ikadushoboza ibyo twe twabonaga ko ari inzozi.   Buri wese ahawe inshingano yo kurandata abanyantege nke badandabirana kugira ngo nabo bazasindagire buhoro buhoro bagere ku byishimo no ku ihumure ribategereje. Bakomejwe n’ uko Imana ubwayo iziyizira. Imana yiboneye akaga k’ abayo. Imana irwana ku ruhande rw’ abarengana, abakene, ingorwa kandi ikabarwanirira bagatsinda icyago. Ngibyo ibyishimo: Imana iba iruhande rw’ abiyoroshya.

IBIGERAGEZO BY’UBUZIMA N’AMIZERO MU NZIRA Y’UKWEMERA

Bavandimwe, natwe ibidukura umutima ni byinshi muri iki gihe. Hari kwibaza niba ejo tuzabona icyo turya, tuzabona icyo twamabara, aho kuba… hari uguhangayika twibaza niba ejo tuzabona akazi, niba abana bacu bazabona amafranga y’ishuri, niba mu rugo rwacu bizagera ubwo habamo amahoro cyane cyane mu ngo zirara zishya kubera ubusinzi, ubusambo n’izindi ngeso mbi. Yezu ati : muhumurize abo bose, ntimutume bakuka umutima kuko mpari kandi nkaba nje kubakiza.

Yakobo mutagatifu mu ibaruwa ye tuzirikana uyu munsi mu isomo rya 2, aratugira inama yo kubaho mu kwihangana ati : “Bavandimwe nimwihangane kugeza igihe Nyagasani azazira. Nk’uko umuhinzi yihangana ategereje umusaruro wo mu butaka bwe, ntarambirwe, ni ko natwe dukwiye kwihangana mu bigeragezo duhura na byo » . Yakobo kandi aratubuza kwijujuta bamwe ku bandi, kugira ngo tutazacirwa urubanza cyangwa tukaba twakwivumbura, tugatangira kubaho uko twishakiye. Aratubwira amizero agomba kuranga utegereje kuzasarura byinshi kuko yabibye neza. Ukuza kwa Yezu mu ikuzo rye ni ko kuzatanga ibyishimo bisendereye ku ntore ze, ibyishimo bisumbye kure ibyo Izayi yatubwiye byo guhunguka. Bizaba ibyishimo ku bakomeye ku butore bw’ Imana bakesha Batisimu. Ni ibyishimo byo kubana ubuzira herezo n’ Imana. Ngibyo ibyishimo nyakuri by’ umukristu.

Bavandimwe, muri iyi si Kiliziya turimo iri mu rugendo rugana ikuzo ry’ijuru. Abakristu twese natwe turi muri urwo rugendo. Muri urwo rugendo duhura n’ibidukomeza, tukihuta, ariko hari n’ibiduca intege byinshi. Tukaba twagira igishuko cyo gucika intege, no gushaka gusubira inyuma, twibaza niba tutarayobye. Aha ni ho ijambo ry’Imana riza kudukomeza, ritwereka n’abandi bakoze urwo rugendo.

YOHANI BATISITA MU BUBABARE ARIKO AGAKOMEZWA NA YEZU KRISTU

Mu Ivanjili, nko ku cyumweru gishize, no kuri iki cyumweru turongera guhura na Yohani Batista, iruhande rwe tukaba tubona Kristu, wa wundi ugomba kuza. Muri Yezu, turabona uburyo ubuhanuzi bwa Izayi bwagiye bwuzuzwa buhoro buhoro. Integuza ya Yezu Yohani Batisita, nyuma yo kwigisha n’ishyaka ryinshi ateguriza Kristu, yarafunzwe azira kuvuga ukuri, yamagana ikibi. Ibyo byatumye nyine afungwa. Muri ubwo bubabare yatangiye kwibaza byinshi, atangira kwiheba, ndetse yumvise ibyo Yezu yakoraga n’ibyo yigishaga akumva atandukanye n’uko yamutekerezaga. Ni ko gutuma kuri Yezu ati: “Ese ni wowe ugomba kuza, cyangwa dutegereze undi?”. Ibi biratwereka ko Yohani Batisita yagezeho na we akiheba akamera nk’ufunzwe ku mubiri no mu bitekerezo, akageza ubwo yibaza ati « Ese sinaba naribeshye, nararuhiye ubusa ? ».

 Iki kibazo kivuye kuri Yohani Batisita kirakomeye. Twibuka ko agitangira yabwiraga abantu kwisubiraho nk’uko twabizirikanye ku cyumweru gishize, akigisha abantu mu butayu no ku nkombe za Yorudani agira ati : « Nimutegure inzira za Nyagasani… rwagati muri mwe hari uwo mutazi… nimuhinduke… muhindure ubuzima bwanyu… ». Icyo gihe cyari igihe atari yihebye, yari azi neza uwo ateguriza amayira.  None atangiye gushidikanya ku wo yari yarategurije amayira. Uku kubaza ni ukugira ngo bimukomeze mu kwemera, bimutere ibyishimo namenya ko nibura n’ubwo afunzwe, bibaye agejeje abantu ku Wo yabarangiraga: Umukiza. Yezu na we ati: “Nimugende mumutekerereze ibyo mwumvise n’ibyo mubona. Impumyi zirabona, abacumbagira baragenda, ababembe barakira ibipfamatwi birumva, abapfuye barazuka, n’abakene barigishwa Inkuru Nziza”.

Ayo magambo Yezu akoresheje amusubiza, ari mu byahanuwe mu gihe cyo kuza k’Umucunguzi mu bantu. Yezu rero aramuhamiriza yuko ibyo byahanuwe muri We byujujwe. Ntiyivuze ibigwi, ahubwo ibyo yigisha, avuga, akora ubwabyo biramuvuga! Ngibi ibyo izo ntumwa 2 zagiye zihamiriza Yohani Batisita. Ubu se kandi yabuzwa n’iki kwishima yarakoze igikwiye? Uburoko ntibushobora kumubuza ibyishimo byo kuba umuranga wa Yezu Kristu kuko amenye neza ko yasesekaye. Na Yezu ubwe acishamo akamuratira abandi: mu babyawe n’abagore, nta wigeze aruta Yohani Batisita.

Muvandimwe, wenda nawe umaze kwiheba, urimo ucika intege wibaza niba Yezu Kristu ari muzima koko. Nyamara nuhuguka, ukareka kurangamira ingorane n’ibibi bikubaho gusa ukarangamira Kristu,urabona ibitangaza byinshi Yezu yagukoreye kandi agumya kugukorera n’uyu munsi mu buzima bwawe nk’icyemezo cy’uko ari muzima kandi akwitaho. Burya akenshi ikibazo tugira mu kwemera kwacu tukiheba, nuko dukunze kurangamira duke Imana itaratugezaho, tukirengagiza umurundo wa byinshi byiza yadukoreye !

GUHINDUKA, KWAKIRA KRISTU NO KUBA INTUMWA Z’IBYISHIMO

Mu ivanjili ya none kandi Yezu ubona ibyihishe akabona n’ibyo dutekereza mu mitima yacu arahindukirana rubanda nyamwinshi bazaga bahururiye ibyo yavugaga n’ibyo yakoraga, akababaza ati “Mwagiye kureba iki mu butayu? Urubingo ruhungabanywa n’umuyaga? Umuntu se wambaye imyenda y’agatangaza? Ati abambaye iy’agatangaza batuye mu ngoro z’abami. Mwagiye kureba umuhanuzi se? koko rero ndabibabwiye, atambutse umuhanuzi”. Ubutumwa bwa Yohani Batisita bwari ubwo gufasha abantu guhinduka, kwigorora n’Imana, kugira ngo bakire Umukiza uje abagana. Nyamara iyo Yezu yitegereje abamuhururiraga asanga hari benshi batarahinduka, baza nk’abahuruye ngo barebe ibitangaza n’ibindi bidasanzwe.

Bavandimwe, umwanya dufata wo gusenga, twitabira amakoraniro ntukabe nk’uwo guhurura ahubwo ujye utubera umwanya wo gusabana n’Imana, no gufata imigambi myiza yo kugororokera Imana, icyo ni cyo kizadukiza. Kandi Niba ibyo twabisobanukiwe, ni bwo koko iki cyumweru kitubera icy’ibyishimo. Twihatire kuba intumwa za Yezu Kristu tumwakire kandi tumushyikirize abandi, tumutegurire amayira maze twige kutamunaniza kandi atwigishe no kutananiza abavandimwe bacu.

Muri iki cyumweru, turangamire Yezu Kristu we soko y’ibyishimo byacu n’amizero mahire. Tumuture abo bose bategura iminsi mikuru yegereje ariko badaha umwanya uhagije Nyir’iyo minsi mikuru. Tubasabire kwakira umukiro uje muri Yezu Kristu we shingiro rya Noheli twitegura kwizihiza.

Nyagasani Yezu nabane namwe !