INYIGISHO KU MUNSI MUKURU WA NYAGASANI YEZU KRISTU UMWAMI W’IBIREMWA BYOSE, UMWAKA C

Bakristu bavandimwe Kristu Yezu, Tugeze ku cyumweru cya 34 Gisanzwe, icyumweru cya nyuma cy’Umwaka wa Liturujiya C. Kiliziya iraturarikira kurangamira no guhimbaza Kristu Umwami w’ijuru n’isi, We Alufa na Omega; Intangiriro n’Iherezo ku byaremye byose, Kristu Umwami w’ibiremwa byose.

Mu myumvire ya muntu, kuba umwami ni ukugira ububasha, imbaraga, icyubahiro, ubutegetsi, kugaragirwa n’ibindi nk’ibyo. Ubuzima bwa Yezu Kristu hamwe n’amasomo matagatifu twateguriwe uyu munsi bitwumvisha neza aho ubwami bwa Kristu bushingiye, uko buteye n’icyo busaba abamuyobotse. Iyo dusomye neza Ivanjili twumva ko Kristu atari umwami nk’abami babaye ibihangange ku isi tuzi mu mateka. Ntabwo arata ubutegetsi bwe ngo ashake gukorerwa ahubwo aharanira gukorera abe.

Ubwami bw’isi n’ubwami bwa Yezu Kristu buratandukanye

Ni byinshi abami bo ku iyi si bamenyekaniraho: Nko kugira ububasha bukomeye ari ku bintu n’abantu, icyubahiro n’ubudahangarwa bavukana aribyo bita ngo ni “ukuvukana imbuto”, kubahwa no gutinywa na bose, kugaragirwa no kurindwa bikomeye… Ese ibi Yezu nawe yaba yarabigize? Ku buhe buryo?

Ushishoje neza usanga ko ubwami bwa Yezu butandukanye cyane n’ubw’abandi bami b’iyi si. Mu gihe abami b’iyi si bica uwo bashaka, bagakiza uwo bashaka, Yezu we yahisemo gupfa mu mwanya wacu, twe abo abereye Umwami. Intebe ye ya cyami nta yindi ni igiti cy’umusaraba, ikamba rye ni ikizingo cy’amahwa, nk’uko umwanditsi w’ivanjili Luka abivuga. Ngo “bamaze kubamba Yezu ku musaraba, rubanda baguma aho bamurebera, abatware bo bakamunyega bavuga bati ‘Yakijije abandi, ngaho na we niyikize niba ari Kristu intore y’Imana!” Ngaho namwe nimwumve umwami rubanda ishungera! Ese umusaraba wanjye mu buzima nywakira nte? Ese aho sinjya nywinubira? Ese aho ntabo naba narabereye umusaraba? Nyamara burya ngo “Imbuto y’umugisha isoromwa ku giti cy’umuruho”.

Aho ubwami bwa Yezu bwongera gutandukanira n’ubwami bw’iyi si rero, ni uko nta wundi mwami tuzi waba warakoze nka we ngo atsinde atagombye gukoresha intwaro. Abami b’iyi si, kugirango ingoma zabo zirambe cyangwa babashe gukiza ababo babanza kwikiza abo bita abanzi. Yewe na Dawudi wabaye umwami w’ikirangirire, yimye ingoma ye ya cyami nyuma yo gutsinda abanzi be. Intego y’abami b’iyi si  ni uko ushaka amahoro ategura intambara. Nyamara Yezu we yatsinze icyaha, atsinda urupfu nta ntwaro akoresheje. Intwaro ye rukumbi kwari ukwicisha bugufi no gukunda. Yezu ni umwami utarigeze utsindwa bibaho, kuko niwe wadutsindiye wa mwamzi wacu twese ari we Rupfu. Ariko Yezu we yaratsinze kugera kundunduro. Ese aho sinjya nihorera? Ese njya ntera amahoro aho ntuye? Ese njya nigiramo umugenzo wo kwiyoroshya?

Ivanjili iraduhamagarira kubura amaso tukarangamira Umusaraba wa Yezu Kristu

Bavandimwe, tugarutse ku Ivanjiri yuyu munsi,  iraduhamagarira rwose kubura amaso yacu tukareba Umusaraba aho Yezu Kristu ari mu mibabaro ku musozi wa Kalivariya. Aho ni ho tubona wa Mushumba mwiza utanga ubuzima bwe ku bw’intama ze. Hejuru y’umusaraba hari handitse ngo: “Uyu ni Umwami w’Abayuda” (Lk 23,38). None se koko uyu muntu uri mu bubabare bwinshi, isura ye yangiritse bigeze aho, ni we Mwami? Ese birashoboka?

Yego, kandi igitangaje, umwe mu bajura bari babambanywe nawe twakwita  mwiza ugereranyije n’usigaye, yabashije kubisobanukirwa. Mu kwizera kwe ati: “Yezu, uranyibuke igihe uzaza mu bwami bwawe” (Lk 23,42). Na Yezu aramusubiza amagambo yuzuye ihumure n’isezerano: “Ndakubwira ukuri, uyu munsi uraba uri kumwe nanjye mu ngoma y’ijuru” (Lk 23,43).

Tube abayoboke b’Ubwami bw’Imana buri munsi

Bavandimwe, ni koko, twemera kandi dutangaza ko Yezu Kristu ari Umwami, Umwami wuzuye ubutware bwose, Umwami utaboneka mu bindi byose isi yigeze ibona. Ubwami bwe ntibugendera ku mategeko y’isi; Ubwami bw’Imana si ubw’iyi si. Ni Ubwami twinjiramo tubikesha guhinduka no guhindurwa n’Ingabire za Roho Mutagatifu. Ni Ubwami bw’ukuri n’ubuzima, bw’ubutagatifu n’ubuntu, bw’ubutabera, urukundo n’amahoro. Ni Ubwami bwavukiye mu gitambo cy’umubiri wa Kristu, mu maraso n’amazi byavuye ku rubavu rwe.

Mu butumwa bwe bwose, Yezu ntiyahwemye kutubwira iby’Ubwami bw’Imana. Yatubwiye ko abahiriwe ari abakene mu mutima, kuko ari bo bazaragwa ubwo Bwami.

Umuhanga wo mu bihe bya mbere bya Kiliziya, Origeni, asobanura amagambo ya Yezu agira ati: “Ubwami bw’Imana buri muri mwe” (Lk 17,21). Atubwira ko umuntu usaba ko Ubwami bw’Imana buza, ari we ubusaba ngo bushore imizi muri we, bukure, bube imbuto, maze bugere ku gasongero ka bwo. Kandi avuga ko ubwo Bwami buri muri twe nibutera imbere, hazuzuzwa ibyanditswe na Mutagatifu Pawulo: ko Kristu, amaze kunesha abanzi be bose, azashyikiriza Se Ubwami bwe, maze Imana ibe byose muri bose. Ni yo mpamvu dusabwa guhora tuvuga tuti: “Izina ryawe niryubahwe, Ubwami bwawe nibuze.”

Bavandimwe, Uyu munsi natwe duterwe akanyamuneza no kuba Abayoboke b’Ubwami bw’Imana. Tububemo ubu, tububamo tugendera mu butagatifu, kandi tubwemeze abandi mu bikorwa by’urukundo. Ibyo bikorwa ni byo bigaragaza ko kwizera kwacu ari ukuri, ko amizero yacu afite ishingiro.

Kandi cyane cyane nk’abanyarwanda uyu munsi twongera kwibuka ko igihugu cyacu cyatuwe Kristu Umwami n’uwari umwami w’u Rwanda, Umwami Mutara wa III Rudahigwa ku wa 27 Ukwakira 1946. Uyu munsi utubere umwanya wo kongera kwikebuka ngo turebe niba ubwami bwa Kristu buganje iwacu mu nzego zinyuranye z’ubuzima bwacu, bityo dukomeze dusabirane ngo Ubwami bw’Imana bukure muri twe, buturangwemo uyu munsi, kugira ngo ku munsi wa nyuma natwe twumve amagambo Yezu yabwiye umujura mwiza : “Uyu munsi uraba uri kumwe nanjye muri Paradizo.”

Nyagasani Yezu nabane namwe!