INYIGISHO KU MUNSI MUKURU W’ABATAGATIFU BOSE, Umwaka wa Liturjiya C

Bavandimwe Kristu Yezu akuzwe, Uyu munsi turi hamwe na Kiliziya yose mu byishimo twizihiza Umunsi Mukuru ukomeye w’Abatagatifu Bose. Abatagatifu ni intore z’Imana zatsinze urugamba rwo mu isi, zikarangiza neza urugendo rwazo mu kwemera, zigasangira ibyishimo by’iteka n’Imana mu ijuru hamwe na Yezu Kristu wazutse akatubimburirayo.

Ni umunsi udusaba kwishimira ibyo Imana yakoze mu bavandimwe benshi bemeye guharanira ubutungane. Ariko kandi, ni n’umunsi utwibutsa ko natwe twese, buri wese ku giti cye, duhamagarirwa kugera ku butagatifu. Nk’uko Yezu ubwe yabivuze ati:“Mube intungane nk’uko So wo mu ijuru ari intungane” (Mt 5,48).

Uyu munsi rero ni umunsi w’ibyishimo, ariko nanone ni umunsi w’ubusabane n’Intore z’Imana; ni umunsi w’icyizere cy’ubuzima bw’iteka.

Imbaga itabarika imbere y’Imana (Ibyah 7, 2-4.9-14)

Mu isomo rya mbere, Yohani Mutagatifu abona mu iyerekwa rye imbaga nyamwinshi cyane, ntawushobora kubabara, ni abo mu moko yose, indimi zose, n’amahanga yose, bambaye imyambaro yera de, bafite amashami y’imikindo mu ntoki, baririmba bati: “Ubucunguzi ni ubw’Imana yacu yicaye ku ntebe y’ubwami n’ubwa Ntama!”

Aba bantu ni intore zatsinze urugamba. Yohani avuga ko “bavuye mu bigeragezo bikomeye, bakuhagiye imyenda yabo mu maraso ya Ntama.” Ni ishusho y’abemeye kubaho mu kuri no mu kwemera, n’ubwo byabasabye gutakaza byinshi, rimwe na rimwe n’ubuzima bwabo. Bivuze ko ubutagatifu atari uguhunga isi, ahubwo ni uguhangana n’ibigeragezo byayo, ukemera kubitsindira muri Yezu Kristu. Abo ni abantu banyuze mu magorwa akabije y’isi, ariko bakagumana ukwizera; banyuze mu bigeragezo, ariko bagakomera mu rukundo rw’Imana, natwe nibatubere inyenyeri zitumurikira muri iyo nzira igana ubutagatifu.

Ab’imitima itunganye ni bo bazabona Imana.

Bavandimwe, Zaburi tuzirikana kuri uyu munsi mukuru itubaza ikibazo kigira kiti: “Ni nde uzazamuka ku musozi w’Uhoraho, ni nde uzahagarara ahantu he hatagatifu?” Ibisubizo ni ibi: “Ni ufite ibiganza bitanduye n’umutima utunganye kandi ntararikire ibintu by’amahomvu.” Iyi Zaburi idutera gukunda umutima utaryarya. Abatagatifu si abantu batigeze bakora amakosa, ahubwo ni abantu bemeye guhora bahinduka, bagahora bashaka kwiyunga n’Imana. Bamenye ko Imana yicaye ku ntebe y’imbabazi maze bagahora yayigana igihe cyose. Burya Ubutagatifu tuvuga butangirira mu mutima wa muntu akiri hano ku isi. Ni umutima wicisha bugufi, wubaha Imana, kandi ushaka gukunda mu kuri no mu budahemuka.

Ni na byo Yohani Mutagatifu atubwira mu isomo rya kabiri atwibutsa ko turi abana b’Imana kandi ari uko tugomba kwitwara. aragira ati: “Dore urukundo Imana Data yadukunze, kugeza aho twitwa abana b’Imana, kandi tur ibo koko!”

Iri jambo ni inkuru nziza iduha kugira icyizere gikomeye . Kuba abana b’Imana bituma tudatinya na rimwe urugendo rugana ku butagatifu. Ubutagatifu rero si ikintu cy’abihayimana gusa, si iby’abapadiri, cyangwa abihayimana, ni umuhamagaro wa buri wese muri iyi si turismo ntabwo ari umwihariko wa bamwe.

Umubyeyi, umunyeshuri, umukozi, umuturage usanzwe, umushumba….twese duhamagarirwa kuba abana b’Imana mu byo dukora byose. Kuba umwana w’Imana ni ukwemera ko Data ari hafi, ko aduhumuriza, ko adusaba gukunda nk’uko akunda.

Ingingo nterahirwe (Mt 5, 1-12a)

Mu Ivanjiri y’uyu munsi, Yezu atwereka inzira y’ubutagatifu nyakuri: ni ingingo cyangwa amahame nterahirwe nkuko dukunze kubivuga:

• Hahirwa abakene ku mutima, kuko ingoma y’ijuru ari iyabo.
• Hahirwa abarira, kuko bazahozwa.
• Hahirwa abafite umutima utunganye, kuko bazabona Imana.
• Hahirwa abatera amahoro, kuko bazitwa abana b’Imana.
• Hahirwa abatotezwa bazira ubutungane, kuko ingororano yabo izaba nyinshi mu ijuru.

Bavandimwe, aha Yezu Kristu araduhishurira ko ubutagatifu atari iby’abafite amahirwe menshi mu buzima busanzwe bwa hano ku isi, ahubwo ni iby’abemera kwakira inzira y’ukuri, y’urukundo, n’umusaraba muri ubu buzima. Ni bamwe bemera kurizwa n’abihaye kuriza abandi ariko bizeye muri Nyagasani ko ibyo bizahinduka maze muri Nyagasani bagatwenga. Ni ubwa bamwe bemera gusonza kuko hari abamize utwabo, bakamira incuti n’inshuro ariko bafite amizero ko muri Nyagasani bizahunduka ukundi. Ubutagatifu ni bamwe bemera gukena ku buryo bwose kuko hari ababakenesheje ariko ntitatitire uwabahanze bakamukomere kuko muri we bizeye ibyiza birenze ibyo bambuwe.

Abatagatifu bose banyuze muri iyi nzira Yezu Kristu atubwira. Nta wigeze aba umutagatifu mu buryo bw’amahoro gusa. Bose banyuze mu bigeragezo, mu kubabara, mu kwihangana, ariko bemera kubikora mu rukundo.

Ubutumwa nyamukuru duhabwa uyu munsi bukubiye mu bintu nka bitatu dusabwa :

-Ubutagatifu ni impano n’inzira: Ni impano kuko Imana yaduhaye ubutagatifu muri Batisimu. Ariko ni inzira kuko dusabwa kubuharanira buri munsi mu buzima bwacu bwa buri munsi,  mu mirimo dukora , mu mibanire yacu n’abandi, mu rugo….

-Ubutagatifu si ukugira ubuzima butagira amakosa ahubwo ni ukwemera guhora duhaguruka, tugasaba imbabazi, tukongera gutangira bundi bushya dusingira Yezu Kristu kugeza igihe tuzamusangira. Burya abatagatifu bose babaye abantu nka twe: bagiraga intege nke, ariko bemera kuyoborwa n’ubuntu bw’Imana.

-Ubutagatifu ni urugendo rwo gukunda: Iyo ukunda Imana n’abantu mu kuri, uba utangiye kuba umutagatifu. Iyo uharanira amahoro mu rugo rwawe, uharanira gukemura ibibazo mu rukundo, uharanira ukuri aho abandi bavugira ibinyoma, icyo gihe uba uri mu nzira y’ubutagatifu.

Bavandimwe, kuri uyu munsi twizihiza abatagatifu bose, abazwi n’abatamenyekanye. Ariko hari abandi benshi bazaba abatagatifu b’ejo hazaza ndetse natwe ubwacu, niba twemeye gukurikira inzira ya Yezu. Reka uyu munsi utubere umunsi wo kwibuka ko turi urubuto rw’ijuru. Turi abashyitsi mu isi, tugana mu ijuru aho abatagatifu batubanjirije. Dusabe rero Imana ngo iduhe imitima ifite ubushake bwo kuba intore, iduhe ubusabane n’abo twizihiza uyu munsi.

Dusabe:Nyagasani Mana, Mwami w’intore zose, turagushimira ku mpuhwe n’ubuntu bwawe bitagira urugero. Turagushimira abatagatifu bose, abamenyekanye n’abatamenyekanye, bakoze icyiza, bagakunda, bagakomera mu kwemera. Dukomeze natwe muri ubwo butungane, ngo tube abahamya b’ukuri kwawe mu isi yacu.

Twigishe gukunda, kwihangana, no guharanira amahoro, kugira ngo igihe cyose tuzarangiza urugendo rwacu hano ku isi, tuzabone kuba mu byishimo hamwe n’abatagatifu bose, ku buvugizi bwa Mariya Mutagatifu kandi tubiheshewe na Kristu Umwami Uhoraho iteka ryose. Amen.

Abatagatifu bose b’Imana, mudusabire!