INYIGISHO YO KU CYUMWERU CYA 30 GISANZWE, UMWAKA C

Bavandimwe Kristu Yezu akuzwe, tugeze ku cyumweru cya 30 Gisanzwe, umwaka wa liturjiya C. Amasomo matagatifu tuzirikana araturakira kuyoboka Imana n’umutima wicisha bugufi.

Kimwe mu bikunze kuranga kamere muntu yacu, ni ukwishyira aheza. Kandi koko n’Umunyarwanda yarabivuze ngo “Ntawishyira ahabi, aheza hahari”. Kabone ni yo twagize intege nke maze tukagwa mu ikosa cyangwa mu cyaha, tuba twumva bidakabije, tuba twumva byoroheje, tuba twumva tutarageza ah’abandi, kuko tuba twiyumvisha ko abandi ari babi kuturusha.  Iteka twishakira impamvu yatumye tugwa mu cyaha, akenshi turirenganura. Abagira imbaraga zo guhita bumva ko bakoze nabi, ndetse byaba na ngombwa bagahita basaba imbabazi, burya si benshi. Twibuke ko no muri cya cyaha cy’umukurambere wacu, ubwo Imana yasangaga yariye kuri cya giti yari yamubujije, aho kugirango ahiteko yemera intege nke yagize, ahubwo yashatse impamvu n’ibisobanuro. “Ngo wa mugore wanshyize iruhande yampaye ndarya; nyamugore na we abajijwe ati: ni inzoka yabikoze…”( Gn 3, 1s).  Ng’uko uko abantu duteye. Yewe n’imbere y’Imana tuba twumva turi intungane, tuba twumva ba ruharwa ari abandi kandi Yo ntacyo twayikinga.

Abafarizayi n’Abasoresha bari abantu batandukanye cyane

Mu masomo matagatifu yo kuri iki cyumweru, mu Ivanjili, Yezu yaciriye umugani abibwira ko ari intungane, maze bagasuzugura abandi bose. Yagize ati “Abantu babiri bahuriye mu Ngoro baje gusenga. Umwe yari Umufarizayi, undi ari umusoresha.. Umusoresha we yihagararira kure, atinya no kubura amaso ngo ayerekeze hejuru, maze yikomanga ku gituza avuga ati ‘Mana yanjye, mbabarira jyewe w’umunyabyaha!’ Ndabibabwiye : Uwo musoresha yasubiye iwe ari intungane, naho ureke undi! Kuko uwikuza wese azacishwa bugufi, naho uwicisha bugufi akazakuzwa.”

Ubundi “Abafarizayi” bari bantu ki? Abangaba bari itsinda ry’abantu basenga, bagakurikiza ya mategeko ya Musa nta n’akadomo bavanyeho. Babaga bazi Bibiliya cyane bakanayigisha, bubahaga isabato ku buryo bukomeye, bakundaga gusiba, batangaga icya cumi ku byabo nk’uko twabyumvise. Ibi byose, akenshi byatumaga umuntu wese utari kumwe nabo ngo na we abikurikize afatwa nk’umunyabyaha. Bamushyiraga mu kato. Gusa mu kuvuga Abafarizayi tujye twitonda kuko hari igihe tubavuga bikarangira natwe tubaye bo, bikarangira natwe dufashe isura mbi ya bamwe muri bo kuko bose siko bari indyarya, dore ko n’ibyo twasomye ari umugani atari inkuru y’umufarizayi n’umusoresha kanaka twabwiwe. Hariho n’Abafarizayi beza. Ingero ni nka Nikodemu. Ubwo bashakaga gufata Yezu, uyu Nikodemu ni we wavuze ati “Harya amategeko yacu apfa gucira umuntu urubanza, batabanje kumwumva ngo bamenye icyo yakoze?” (Yh 7, 50).

Abasoresha bo bafatwaga nka ba ruharwa mu byaha. Abangaba bakoreraga ubutegetsi bw’Abaromani bwari bwarakandamije Abayahudi. Bari bashinzwe kubakusanyiriza imisoro kandi kuko bakoreraga umukoroni utarabhembaga neza, bagavuraga byinshi kugira ngo nabo bagire icyo bihereza. Bityo rero Abayahudi babafataga nk’abagambanyi, abandi bakabafata nk’ibisambo kuko nkuko twabivuze, hari n’igihe basoreshaga bakaka ibirenze kugirango nabo babone icyo bashyira mu mufuka. Hari n’abandi babafataga nk’abantu bataye ukwemera kubera ko kuri bya biceri birirwaga bakorakora byabaga biriho ishusho y’umwami Kayizari, kandi uyu akaba yariyitaga imana.

None Yezu aratinyutse agereranya abo bantu bombi, umufarizayi n’umusoresha. Mu gihe cya Yezu aba bombi bari abantu badashobora kugereranywa bibaho nkuko namwe mubyumva. Usibye Yezu nyine, nta wundi muntu wari kubitinyuka, kandi noneho igitangaje ni uko muri uko kugereranya amasengesho yabo, umusoresha ni we watashye ari intungane. Umwanya n’isura rubanda bambikaga Abafarizayi byarangiye byegukanye Umusoresha wabashije kwegera Imana n’umutima wicishije bugufi. Ngiryo ibanga ryo kwicisha bugufi abenshi batazi!

Isengesho ry’Ukuri: Umufarizayi wikuza cyangwa Umusoresha wicisha bugufi ?

Muri ariya  masengesho yabo, ngo ni uko umufarizayi aremarara ati: “aremarara, asengera mu mutima we avuga ati ‘Mana, ndagushimira ko ntameze nk’abandi bantu b’ibisambo, b’abahemu, b’abasambanyi, mbese nk’uriya musoresha! Nsiba kurya kabiri mu cyumweru, ngatanga kimwe cya cumi cy’urwunguko rwanjye rwose” . Umufarizayi atangiye ashimira Imana. Nta kintu na mba yigeze asaba, kuko ntacyo akeneye, arihagije, ni intungane. Mu byukuri muri kiriya gihe, amasengesho ajya kumera nka ririya yabagaho, ariko hano icyo Yezu atamushimye ni kuriya kwibona, ni buriya bwirasi, ni kuriya kumva ko ari intungane, ko atameze nk’abandi.

Bavandimwe, natwe dushobora kwibwira ko uyu munsi nta bafarizayi bakibaho kuberako ntawe uzi ahantu aha n’aha batuye cyangwa bakorera. Nyamara twese twisuzumye, twasanga natwe twifititemo akantu k’ubufarizasi. Ese nta gihe mu isengesho ryanjye njya mbwira Imana nti “Mana ndagushimira ko ntameze nka runaka? Ndagushimira ko abana banjye batabaye nk’abo kwa runaka? Ko umugore wanjye atameze nk’uwa runaka? Ko umugabo wanjye atameze nk’uwa runaka? ko urugo rwanjye rutameze nk’urwo kwa runaka?Ko jyewe ntajya mba uwa nyuma mu ishuri nka runaka?”

N’aho umusoresha we yihagararira kure, atinya no kubura amaso ngo ayerekeze hejuru, maze yikomanga ku gituza avuga ati  “Mana yanjye, mbabarira jyewe w’umunyabyaha!” Bavandimwe ngiri isengesho twese twakagombye kujya dutura Imana. Burya muntu wese aho ava akagera, ni umunyabyaha imbere y’Imana, dore ko twe tunavukana igicumuro. Akeneye imbabazi n’impuhwe z’Imana. Burya ibikorwa byacu uko byaba byiza gute, ubwabyo ntabwo byatugira intungane. Imana yonyine niyo ishobora kutugira intungane. Uriya musoresha agizwe intungane no kwemera intege nkeya ze. Ntabwo yigeze avuga ati ngiye gusubiza iby’abandi byose nk’uko Zakewusi we yabikoze. Kwemera icyaha cye ni byo byonyine bimugize intungane.  Mwene Siraki yagize ati “Uhoraho ni we mucamanza…Isengesho ry’uwicisha bugufi rigera mu bicu” mu gihe iry’uwikuza ritarenga n’igisenge cy’akanwa arivugishije.

Kwicisha bugufi ni Inzira y’ukuri igeza ku Mana

Mu gihe ku cyumweru gishize twabwirwaga ko isengesho ryiza ari iryo dusenga tutarambirwa, uyu munsi tubonye ko rigomba kuba n’isengesho ryicisha bugufi, isengesho ritikuza, isengesho ridacira abandi imanza, kuko Imana yonyine ariyo igomba kuducira imanza, yo nyine itigera ibera bibaho. Na Pawulo mutagatifu nyuma yo kurwana inkundura urugamba rwo kwamamaza Ivanjili, ntabwo yikuza maze ngo avuge ko ari intungane, ahubwo yivugira ko nawe ikamba azarigororerwa na Nyagasani umucamanza utabera.

Bavandimwe, Yezu ni we wicishije bugufi, kugera n’aho apfiriye ku giti cy’umusaraba ngo turonke umukiro, aricyo cyatumye Imana imukuza maze ikamuzura mu bapfuye, ikamuha izina risumba ayandi mazina yose. Yezu ni muzima mu Ukaristiya, tumwegere twiyoroheje nk’uriya musoresha tumusabe maze natwe aduhe umutima utuza kandi woroshya nk’uwe, aduhe kugira urukundo nyarukundo rwa kivandimwe, rumwe rutagira n’umwe rushyira mu kato, maze tuzabane na we mu ngoma y’ijuru ubuziraherezo, twambikwe ikamba ryagenewe abasenga Imana n’umutima wiyoroheje.

Nyagasani Yezu nabane namwe!